Heroine రుక్సార్‌ థిల్లాన్‌..

పాకెట్‌ మనీ సంపాదించుకునేదాన్ని

లండన్‌లో పుట్టి.. బెంగళూరులో స్థిరపడ్డ పంజాబీ అమ్మాయి రుక్సార్‌ థిల్లాన్‌… చెఫ్‌ కావాలనుకొని.. ఫ్యాషన్‌ డిజైనింగ్‌ కోర్సు చేసి అనుకోకుండా తెరంగేట్రం చేసేసింది… ఆకతాయిగా పరిచయమై.. కృష్ణార్జున యుద్ధంతో మెప్పించి.. ఏబీసీడీతో మరోసారి మనముందుకొచ్చింది రుక్సార్‌ థిల్లాన్‌… అవకాశం ఈజీగా వచ్చినా.. దాన్ని నిలబెట్టుకోవాలంటే హార్డ్‌వర్క్‌ తప్పదంటున్న రుక్సార్‌ తన నేపథ్యం, కాలేజీ కబుర్లు, సినిమాలపై మమకారం గురించి ఇలా చెబుతోంది.

అనుకోకుండా అడుగులు: పెద్దయ్యాక హీరోయిన్‌ అయిపోవాలని నేనెప్పుడూ కలలు కనలేదు. అనుకోకుండానే సినిమా అవకాశం పలకరించింది. ఆ తర్వాత మాత్రం వందశాతం మనసుపెట్టి పని చేస్తున్నా. ఏదైనా క్రియేటివ్‌ ఫీల్డ్‌ ఎంచుకోవాలనీ, నేనేంటో నిరూపించుకోవాలని చిన్నప్పట్నుంచీ చాలా ఆసక్తిగా ఉండేది. మంచి చెఫ్‌ కావాలనీ, హోటల్‌ మేనేజ్‌మెంట్‌ కోర్సు చేసి స్టార్‌ హోటళ్లలో పని చేయాలనీ అనుకునేదాన్ని. కానీ దానికి భిన్నంగా, నా ప్రమేయం లేకుండానే సినిమాల్లోకి వచ్చా.

మొదటి అవకాశం: కాలేజీలో ఉన్నపుడు ‘మిస్‌ బెంగళూరు’ పోటీలు జరుగుతున్నాయి. ఫ్రెండ్స్‌ ప్రోత్సాహంతో సరదాగా ప్రయత్నించా. సెకండ్‌ రన్నరప్‌గా నిలిచా. ‘కళ్యాణ సిల్క్స్‌’ యాడ్‌ అవకాశమొచ్చింది. అది చెప్పలేనంత పేరు తీసుకొచ్చింది. తర్వాత ఇతర మోడలింగ్‌ అవకాశాలు వచ్చినా గ్రాడ్యుయేషన్‌ పూర్తయ్యేదాకా ఏవీ చేయకూడదని వదులుకున్నా. అనుకున్నట్టే చదువు పూర్తి చేశా. తర్వాత కొందరు కన్నడ దర్శకుల నుంచి పిలుపొచ్చింది. ‘ఎంతో కష్టపడితేగానీ ఇలాంటి అవకాశం రాదు. నిన్ను పిలిచి హీరోయిన్‌ చేస్తానంటున్నారు. అస్సలు వదులుకోవద్దు’ అన్నారు సన్నిహితులు. ఇంకేం.. నేను హీరోయిన్‌ అయిపోయినట్టేనని సంతోషంగా వెళ్లా. కానీ అక్కడికెళ్లాక ఆడిషన్‌ చేశారు. నటించి చూపించమన్నారు. ఫొటోషూట్‌ తీసుకున్నారు. ఎమోషన్స్‌లో సరిగా పలుకుతున్నాయో, లేదో పరిశీలించారు.. ఇవన్నీ నచ్చాకే మొదటి అవకాశం ఇచ్చారు. అలా ‘రన్‌ ఆంటోనీ’తో తొలిసారి తెరపై కనిపించా. ఆపై ఆకతాయి, కృష్ణార్జునయుద్ధం సినిమాలతో తెలుగువాళ్లకి దగ్గరయ్యా.

లండన్‌లో పుట్టా: అమ్మానాన్నలు లండన్‌లో ఉన్నపుడు నేను అక్కడే పుట్టా. తర్వాత వాళ్లు వ్యాపారం కోసం గోవాకి వచ్చారు. తొమ్మిదో తరగతి వరకు మనోవికాస్‌ ఇంగ్లిష్‌ మీడియం స్కూళ్లో చదువుకున్నా. తర్వాత నా చదువుకోసం బెంగళూరుకి వచ్చి ఇక్కడే స్థిరపడ్డాం. నేనేం చేసినా బాగా ఆలోచించి సరైన నిర్ణయం తీసుకుంటానని అమ్మానాన్నలకు నాపై నమ్మకం. ఇది చేయాలి.. అది చేయొద్దని ఎప్పుడూ ఆంక్షలు విధించలేదు. చదువు, కెరీర్‌ విషయాల్లో నీకు నచ్చిందే చెయ్‌మన్నారు. సినిమాల్లోకి వెళ్తానన్నప్పుడు కూడా అభ్యంతరం చెప్పలేదు. మా కుటుంబానికెలాంటి సినిమా నేపథ్యం లేకపోయినా బాగా ప్రోత్సహించారు.

కాలేజీ రోజులు: అందిరిలాగే కాలేజీ రోజులు నా జీవితంలో గోల్డెన్‌ డేస్‌గా చెప్పుకోవచ్చు. కాలేజీలో ఉన్నపుడే అందాల పోటీల్లో గెలవడం జీవితంలో మర్చిపోలేని రోజు. చదువుల్లో ముందుండేదాన్ని. తరగతిలో టీచర్లకి నేను ‘గుడ్‌ గాళ్‌’ని. సినిమాలు, పార్టీల కోసం క్లాస్‌లు బంక్‌ కొట్టిన సందర్భాల్లేవు. ఇద్దరు అబ్బాయిలు వెంటపడ్డారు. లవ్యూ అన్నారు. అదంతా సరదాసరదాగా ఉండేదే తప్ప నన్నెవరూ సీరియస్‌గా లవ్‌ చేయలేదు. నేనూ ప్రేమలో పడలేదు.

మర్చిపోలేను: ఎలాంటి సినిమా నేపథ్యం లేని కుటుంబం మాది. పెద్దగా కష్టపడకుండా అవకాశమొచ్చింది. మొదటి అవకాశం, మొదటిసారి కెమెరా ముందు నిల్చున్నపుడు, మొదటి సాంగ్‌ చిత్రీకరణ, వందల మందితో కలిసి పనిచేయడం, పరాయి రాష్ట్రమైనా తెలుగు జనం నన్ను ఆదరించడం.. ఇవన్నీ మర్చిపోలేని క్షణాలే. ఒక్కోసారి అదృష్టంకొద్దీ తేలిగ్గానే మనకు మంచి అవకాశాలొస్తుంటాయి. వాటిని నిలబెట్టుకోవాలంటే మాత్రం బాగా కష్టపడాలి. నేను మిడిల్‌క్లాస్‌ అమ్మాయినైనా నాలో ఆత్మవిశ్వాసం ఎక్కువ. చదువుకుంటున్నపుడే చిన్నచిన్న పనులు చేస్తూ పాకెట్‌మనీ సంపాదించుకునేదాన్ని. నిజాయతీగా, కష్టపడి పని చేస్తే ఏ అమ్మాయైనా అనుకున్నది సాధించగలదు.
* బెంగళూరు యూనివర్సిటీలో ఫ్యాషన్‌ డిజైనింగ్‌ కోర్సు చేశా.
* రుక్సార్‌ అనే పేరుకి గులాబీ రంగు చెక్కిళ్లు అని అర్ధం.
* ఖాళీగా ఉన్నప్పుడు వంట చేస్తా. అది ఒత్తిడి ఉపశమనంలా పని చేస్తుంది.
* టాలీవుడ్‌లో నేను కలిసి పనిచేయాలనుకునే హీరోలు మహేశ్‌బాబు, అల్లు అర్జున్‌.
* యాక్టింగ్‌ కాకుండా బొమ్మలు బాగా వేస్తాను.

- శ్రీనివాస్‌ బాలె

 

charector artist Rallapalli

90fab080-14c1-456a-a6c5-1105114ff728 ead8c1e6-59b7-4695-aa68-cef72b608bdf fc06506e-b8a1-414e-a8c1-e59bd6fbbd25

 

ప్రముఖ నటుడు రాళ్లపల్లి కన్నుమూత
 ప్రముఖ సినీ నటుడు రాళ్లపల్లి వెంకట నర్సింహారావు (73) కన్నుమూశారు. శ్వాసకోశ సంబంధిత వ్యాధితో గత కొంతకాలంగా బాధపడుతున్న ఆయన ఈ రోజు తన నివాసంలో అస్వస్థతకు గురికావడంతో కుటుంబ సభ్యులు ఆస్పత్రిలో చేర్పించారు. ఆరోగ్య పరిస్థితి విషమించడంతో శుక్రవారం సాయంత్రం మాదాపూర్‌లోని మ్యాక్స్‌క్యూర్‌ ఆస్పత్రిలో చికిత్సపొందుతూ తుదిశ్వాస విడిచారు. కళాకారుడు ఎప్పుడూ నిత్యవిద్యార్థే అని చెప్పే రాళ్లపల్లి 1960లో ముఖానికి రంగులు వేసుకొని నటనా జీవితానికి శ్రీకారం చుట్టారు. అనంతరం 1974లో ‘స్త్రీ’ చిత్రంతో సినీరంగ ప్రవేశం చేసిన రాళ్లపల్లి.. శుభలేఖ, ఖైదీ, ఆలయ శిఖరం, మంత్రిగారి వియ్యంకుడు, అభిలాష, శ్రీవారికి ప్రేమలేఖ, సితార, ఆలాపన, న్యాయానికి సంకెళ్లు, ఏప్రిల్‌ 1 విడుదల, సూర్య ఐపీఎస్‌, దొంగపోలీసు, కన్నయ్య కిట్టయ్య, సుందరకాండ, భలే భలే మగాడివోయ్‌ తదితర 850కి పైగా చిత్రాల్లో నటించారు. 1945 ఆగస్టు 15న అనంతపురం జిల్లా కంబదూరులో జన్మించిన రాళ్లపల్లికి ఇద్దరు కుమార్తెలు. ఒక కుమార్తె మృతి చెందగా.. మరో అమ్మాయి అమెరికాలో ఉంటున్నారు. రాళ్లపల్లి భౌతికకాయాన్ని నిమ్స్‌లోని మార్చురీకి తరలించారు. అమెరికా నుంచి ఆయన కుమార్తె వచ్చేంత వరకు అక్కడే ఉంచనున్నారు.

‘బొంబాయి’లో హిజ్రాపాత్రతో ఔరా అన్పించారు!
తెలుగు, తమిళ చిత్రాల్లో హాస్యనటుడిగా ప్రేక్షకుల్లో విశేష ఆదరణ పొందిన రాళ్లపల్లి.. సినీ ప్రస్థానంలో తన విలక్షణమైన నటనతో ఐదు నంది అవార్డులు సొంతం చేసుకున్నారు. దాదాపు 3 దశాబ్దాలకుపైగా సినీ పరిశ్రమకు ఆయన విశేష సేవలందించారు. మణిరత్నం దర్శకత్వంలోని ‘బొంబాయి’ చిత్రంలో హిజ్రాగా నటించి ఔరా అన్పించారు. రాళ్లపల్లికి విద్యార్థి దశ నుంచే నాటకాల పట్ల ఎంతో మక్కువ. ఆ ఇష్టంతోనే 1974లో సినీ రంగ ప్రవేశం చేశారు. దాదాపు 8వేలకు పైగా  నాటకాల్లో నటించిన ఆయన చాలా భాగం నాటకాలకు స్వయంగా దర్శకత్వం వహించారు. కేవలం హాస్య నటుడిగానే కాకుండా విభిన్న పాత్రల్లో ప్రేక్షకులను ఆకట్టుకున్నారు. రాళ్లపల్లికి చిల్లరదేవుళ్లు, చలిచీమలు వంటి చిత్రాలు మంచి గుర్తింపు తీసుకొచ్చాయి. జంధ్యాల, వంశీ చిత్రాల్లో కీలక పాత్రల్లో నటించారు.  పొట్టి శ్రీరాములు తెలుగు విశ్వవిద్యాలయంలో రాళ్లపల్లి ఎంఫిల్‌ చేస్తున్నారు. రాళ్లపల్లి మృతిపట్ల తెలుగు చిత్రపరిశ్రమ ప్రముఖులు, సినీ అభిమానులు తీవ్ర దిగ్బ్రాంతి వ్యక్తం చేస్తున్నారు.

తెరపై ‘రాళ్లపల్లి’ పేరు వెనుక అసలు కథ..

హైదరాబాద్‌: విలక్షణ నటుడిగా తెలుగు, తమిళ భాషల్లో గుర్తింపు తెచ్చుకున్న రాళ్లపల్లి శుక్రవారం సాయంత్రం కన్నుమూసిన సంగతి తెలిసిందే. రంగస్థల నటుడిగా కెరీర్‌ను ఆరంభించి,  వెండితెరపై నటుడిగా చెరగని ముద్రవేశారు. అయితే, ఆయన పూర్తిపేరు రాళ్లపల్లి వెంకట నర్సింహారావు కాగా, ఇంటి పేరుతోనే ఆయన తెలుగువారికి సుపరిచితులు. అసలు ఆయన ఇంటి పేరే ఒంటిపేరు ఎలా అయిందని అడిగితే, గతంలో ఆయన పంచుకున్న విషయాలివి…

పేరు అలా మార్చేశారు!
‘‘బాపు దర్శకత్వంలో ‘తూర్పు వెళ్లే రైలు’తో నా పేరును రాళ్లపల్లి అని వేయడం ప్రారంభించారు. అంతకు ముందు నటించిన చిత్రాల్లో రాళ్లపల్లి వెంకట నర్సింహారావు అని, ఆర్వీ నర్సింహారావు అని వేసేవారు. ఒకరోజు బాపుగారు ‘ఎందుకండీ ఇంత పెద్ద పేరు. రాళ్లపల్లి బాగుంది కదా’ అని అనడంతో నేనూ సరేనన్నాను. ఆ సినిమా నుంచి టైటిల్స్‌లో అలా వేయడం మొదలు పెట్టారు. చెన్నైలో నన్ను అందరూ ముద్దుగా ‘స్టోన్‌ విలేజ్‌’ అని పిలిచేవారు. ఎన్టీఆర్‌ తనయుడు హరికృష్ణ  కూడా ‘స్టోన్‌ విలేజ్‌’ అని పిలిచి ఆటపట్టించేవారు. ఇక నా ఇంటిపేరును అచ్చ తెలుగులో చెప్పాంటే ‘శిలా గ్రామం’’.

సినిమాలు తీయడం మానేస్తానన్న బాపు
‘‘అప్పుడు నేను రైల్వే కాంట్రాక్టు ఉద్యోగిగా పనిచేస్తున్నా. ‘తూర్పు వెళ్లే రైలు’ సినిమా చేసే అవకాశం వచ్చింది. దీంతో ఉద్యోగానికి వెళ్తూనే ఆ సినిమాలో చేసేవాడిని. ఒకరోజు బాపుగారి దగ్గరకు వెళ్లి ‘సర్‌ నాది అసలే కాంట్రాక్టు ఉద్యోగం. ఈ సినిమా తర్వాత నా ఉద్యోగం ఉంటుందో ఊడుతుందో తెలియదు.’ అని అంటే, ‘ఈ సినిమా విడుదల అయిన తర్వాత మీరు ఉద్యోగం చేయాల్సిన అవసరం రాదు. ఒకవేళ మీరే మళ్లీ ఉద్యోగం చేయాల్సి వస్తే, నేను సినిమాలు తీయడం మానేసి బొమ్మలు వేసుకుంటూ బతుకుతా.’ అని అన్నారు’’

‘బొంబాయి’లో అవకాశం అలా వచ్చింది
‘‘నేను చేసిన పాత్రల్లో ‘బొంబాయి’లోని హిజ్రా పాత్ర ప్రత్యేకం. ఆ పాత్రకోసం మణిరత్నంగారు ఒక నటుడిని వెతుకుతున్నారని తెలిసింది. అదే సమయంలో ఆయన దగ్గర కో-డైరెక్టర్‌గా పనిచేసే పాణిగారు నా పేరును సూచించారు. ఆ పాత్రకు నేనైతే న్యాయం చేస్తానని చెప్పారట. దీంతో ఆ సినిమాలో పనిచేసే అవకాశం వచ్చింది. నేను కూడా ఆ పాత్ర చేయడానికి అభ్యంతరం చెప్పలేదు. ఎందుకంటే ఒక నటుడికి గుర్తింపు వచ్చిన తర్వాత అదే ఇమేజ్‌లో చూస్తారు. నేను స్టార్‌ని కాదు.. ఆర్టిస్ట్‌ను మాత్రమే. నేను నటించిన వాటిల్లో డిఫరెంట్‌ క్యారెక్టర్లు ఉన్నాయి. నేను కేవలం కమెడియన్‌ను మాత్రమే కాదు. నా అదృష్టం ఏంటంటే.. భారతీ రాజా, మణిరత్నం, రాజీవ్‌మేనన్‌, విశ్వనాథ్‌, జంధ్యాలలాంటి గొప్ప వ్యక్తుల సినిమాల్లో నటించా’’

భరణి నాకు భగవంతుడు ఇచ్చిన కొడుకు
‘‘కలిసొచ్చే కాలం వస్తే, నడిచొచ్చే కొడుకు పుడతాడని సామెత ఉంది కదా! అలా భగవంతుడు ఇచ్చిన కొడుకు తనికెళ్ల భరణి. 1966-70 మధ్యలో ఇద్దరం కలిసి నాటకాలు వేసే వాళ్లం. తను మా కుటుంబంలో సభ్యుడైపోయాడు. అతనిలో మంచి రచయిత ఉన్నాడని అప్పుడే తెలుసు. ‘ప్రేమించు పెళ్లాడు’ సినిమా నిడివి తగ్గడంతో వంశీగారికి తనికెళ్ల భరిణిని నేనే పరిచయం చేశా. అంతకుముందు తను ‘కంచు కవచం’ సినిమాకు రచయితగా పనిచేశాడు. నాకు, రాజేంద్రప్రసాద్‌, వై. విజయలకు కామెడీ సీన్లు రాస్తే బాగా పండాయి. ఆ తర్వాత ‘లేడీస్‌ టైలర్‌’ ఎంత పెద్ద హిట్టో అందరికీ తెలిసిందే. అలా మా ప్రయాణం సాగింది’’

ఫోన్‌ చేసి ఉంటే రంగనాథ్‌ బతికి ఉండేవారేమో!
‘‘రంగనాథ్‌ చనిపోయే ఒక్కరోజు ముందు నేను ఏదో మలయాళ సినిమాకు తెలుగు డబ్బింగ్‌ చెబుదామని స్టూడియోకు వెళ్లా. లోపలికి వెళ్లే సమయంలో నా ఫోన్‌ ఒక వ్యక్తికి ఇచ్చి వెళ్లాను. అదే సమయంలో రంగనాథ్‌ ఫోన్‌ చేశారట. అయితే, బయటకు రాగానే ఆ వ్యక్తి రంగనాథ్‌ ఫోన్‌ చేసిన విషయం నాకు చెప్పలేదు. సాయంత్రం ఎప్పుడో చెప్పాడు. ‘తర్వాత మాట్లాడదాం లే’ అన్న ఉద్దేశంతో నేనూ అశ్రద్ధ చేశా! కానీ, మరుసటి రోజు ఆయన మరణవార్త విని  దిగ్భ్రాంతికి గురయ్యా. ఆ రోజు నేను ఫోన్‌ చేసి ఉంటే, నాతో ఏం మాట్లాడేవారో.. అందుకు నేను ఇప్పటికీ బాధపడుతూనే ఉన్నా’’

 

4a838991_08-crop--581a06

Heroine Anu immanyuel

 

విని వదిలేయాలి… అంతే!
27-10-2018 23:48:43
చెంపకు చారడేసి కళ్లు… పెదవంచున సన్నటి నవ్వు.. మత్తుమత్తుగా వినిపించే హస్కీ వాయిస్‌.. చీరకట్టులోనూ, బికినీలోనూ మెప్పించే టాలెంట్‌.. ఇన్ని లక్షణాలను సొంతం చేసుకున్న అనూ ఇమ్మాన్యుయేల్‌ ‘నవ్య’తో ప్రత్యేకంగా ముచ్చటించారు. ఆ విశేషాల సమాహారం..
హాయ్‌ అనూ ఎలా ఉన్నారు?
అనూ : ఐయామ్‌ గుడ్‌ అండీ!
తెరపై మీరు బాగా తెలుసు. కానీ, తెరవెనుక ఇంట్లో అనూ ఎలా ఉంటారు?
అనూ : నేను చాలా బోరింగ్‌ పర్సన్‌ని. చదువుకునే రోజుల్లోనైనా, సినిమాల్లోకి వచ్చిన తర్వాత అయినా ఖాళీ ఉంటే రోజంతా ఇంట్లోనే ఉండటానికి ఇష్టపడతా. నా పెట్‌డాగ్‌తో ఆడతా. లేదంటే ఒంటరిగా కూర్చుని సినిమాలు చూస్తా. అయినా బోర్‌ కొడితే.. ప్రశాంతంగా నిద్రపోతా. సాయంత్రం సమయంలో షాపింగ్‌కు వెళ్లడమంటే ఇష్టం. పుస్తకాల పురుగును కాదు. కానీ నచ్చిన పుస్తకం చదవడంలో ఉన్న కిక్‌ను బాగా ఎంజాయ్‌ చేస్తా. పర్సనాలిటీ డెవల్‌పమెంట్‌ పుస్తకాలు ఎక్కువగా చదువుతా. వాటి నుంచీ చాలా నేర్చుకుంటా. ఓప్రా విన్‌ఫ్రే రచించిన ‘వాట్‌ ఐ నో ఫర్‌ ష్యూర్‌’ నన్ను చాలా ప్రభావితం చేసిన పుస్తకం. వజ్రాలు కావాలా? పప్పీ్‌స(పెట్‌డాగ్స్‌) కావాలా? అంటే పప్సీస్‌ కావాలని కోరుకుంటా.
మీ ఫ్యామిలీ గురించి చెబుతారా?
అనూ : నాన్న తంగచ్చిన్‌ ఇమ్మాన్యుయేల్‌ కేరళలోని కొట్టాయమ్‌కు చెందిన వ్యక్తి. అమ్మ అక్కడే ఆసుపత్రిలో ఉద్యోగి. కొంతకాలం అమెరికాలో ఉన్నాం. నేను పుట్టి పెరిగిందీ, చదువుకుందీ అంతా అమెరికాలోనే! నాకొక అన్నయ్య ఉన్నాడు. ప్రస్తుతం బిజినెస్‌ మేనేజ్‌మెంట్‌ చేస్తున్నాడు. నాన్నకూ, నాకూ సినిమాలంటే చాలా ఇష్టం. ఆయన మలయాళ చిత్రాల నిర్మాత కూడా. ఆరేడేళ్ల వయసు నుంచీ నాకు సినిమాల్లో నటించాలని ఆశ. చిన్నప్పటి నుంచీ నాన్నంటే చాలా భయం. అందుకే సినిమాల ప్రస్తావన ఆయన దగ్గర తీసుకురాలేదు.
2011లో నాన్న నిర్మించిన ‘స్వప్న సుందరి’ సినిమాలో హీరోకి కూతురిగా నటించే అవకాశం ఇచ్చారు. ఆ సినిమా కోసం అమెరికాలోని డల్లాస్‌ నుంచీ కేరళకు వచ్చా. ఎందుకో ఆ షూటింగ్‌నూ, సినిమానూ ఎంజాయ్‌ చెయ్యలేకపోయా. లాభం లేదనుకుని అమెరికా ఫ్లైట్‌ ఎక్కేశా. అక్కడే చదువు కంటిన్యూ చేశా. చిన్నప్పటి నుంచీ నా తల్లితండ్రులు నచ్చింది చేసే స్వేచ్ఛనిచ్చి పెంచారు. యాక్టింగ్‌ కెరీర్‌గా ఎంచుకోవడం కూడా నా ఇష్టప్రకారమే జరిగింది. వాళ్లు నన్ను ఎంకరేజ్‌ చేశారు.
అసలు హీరోయిన్‌గా మీ ఎంట్రీ ఎలా జరిగింది?
అనూ : ఓ సందర్భంలో నాన్నకు తెలిసిన ఓ మ్యాగజైన్‌ ఎడిటర్‌తో మాట్లాడి నా ఫొటోను కవర్‌ పేజీగా వేయించారు. ఆ ఫొటో సోషల్‌ మీడియాలో వైరల్‌ అయింది. దాన్ని చూసి మలయాళ హీరో నివిన్‌ పాల్‌ నన్ను సంప్రతించారు. స్కైప్‌లో ఆడిషన్‌ చేసి ‘యాక్షన్‌ హీరో బిజు’లో హీరోయిన్‌గా అవకాశం ఇచ్చారు. అలా కథానాయికగా మొదటి అవకాశం అందుకున్నా. ఏదన్నా చెయ్యాలని గట్టిగా సంకల్పించుకుంటే అది తప్పకుండా జరుగుతుందని మొదటి అవకాశం అందుకున్నాక అర్థమైంది.
తొలి తెలుగు అవకాశం ఎలా వచ్చింది?
అనూ : తెలుగులో నేను సైన్‌ చేసిన మొదటి సినిమా ‘ఆక్సిజన్‌’. విడుదలైంది మాత్రం నానితో నటించిన ‘మజ్ను’. ఇన్‌స్టాగ్రామ్‌లో నా ఫొటోలు చూసి దర్శకుడు విరించి వర్మ ఆడిషన్‌ చేశారు. ‘మజ్ను’లో కిరణ్మయి పాత్రకు సూటవుతానని నమ్మి అవకాశం ఇచ్చారు. ఆ తర్వాత ‘కిట్టు ఉన్నాడు జాగ్రత్త’, ‘అజ్ఞాతవాసి’, ‘నా పేరు సూర్య’లో నటించా.
‘మజ్ను’ మినహాయిస్తే మీరు నటించిన చిత్రాలు అంతగా సక్సెస్‌ కాలేదు. అయినా స్టార్‌ హీరోల సరసన వరుసగా అవకాశాలు రావడం అంత తేలిక కాదేమో కదా…
అనూ : సక్సెస్‌ లేకుండా సినిమా ఇండస్ట్రీలో అవకాశాలు అందుకోవడం కష్టమే. సినిమా ఫెయిల్‌ అయినంత మాత్రాన అందులో నటీనటులు, వారి నటన ఫెయిల్‌ అయిందనుకోకూడదు. వాటిలో నా నటన నచ్చబట్టే స్టార్‌ల పక్కన అవకాశాలు వచ్చాయని నేననుకుంటున్నా. చేసిన పాత్ర పండినా సినిమాకు టాక్‌ బాగోకపోతే సంతృప్తి ఉండదు. అది నాకూ ఉంది. కష్టాల నుంచే సక్సెస్‌ మొదలవుతుందని భావిస్తున్నా. అపజయం నేర్పించే పాఠం ఎప్పటికీ మరచిపోలేం.
సూపర్‌హిట్‌ ‘గీత గోవిందం’లో హీరోయిన్‌గా చెయ్యలేకపోయినందుకు ఫీలయ్యారా?
అనూ : చాలా ఫీలయ్యా. ‘గీత గోవిందం’లో కథానాయికగా ఫస్ట్‌ చాయిస్‌ నేనే. కానీ అదే సమయంలో ‘నా పేరు సూర్య’ సినిమా చెయ్యడం వల్ల డేట్స్‌ క్లాష్‌ అయ్యాయి. అందుకే ఆ సినిమా చెయ్యలేకపోయా. కానీ దర్శకుడు పరశురామ్‌గారు అతిథి పాత్ర ఇచ్చారు. అదైనా దక్కినందుకు ఆనందంగా ఉంది. ఫైనల్‌గా చూస్తే ‘గీత గోవిందం’ పాత్ర మిస్‌ అవ్వడం చాలా బాధగా ఉంది.
ఓ సినిమా అంగీకరించాలంటే మీరిచ్చే ప్రాధాన్యం దేనికి?
అనూ : ఒక సినిమాకు సైన్‌ చెయ్యాలంటే ఒక్క ఎలిమెంట్‌ని బేస్‌ చేసుకోకూడదు. సినిమాకు కథ ఎంత ముఖ్యమో.. హీరో, డైరెక్టర్‌, బ్యానర్‌ అన్నీ పక్కాగా కుదిరితేనే అది మంచి సినిమా కాగలదు. ‘అజ్ఞాతవాసి’ అంగీకరించడానికి కారణం స్టార్‌ హీరో, పవన్‌కల్యాణ్‌ ఉన్నారనో, స్టార్‌ డైరెక్టర్‌ త్రివిక్రమ్‌ ఉన్నారనో చెప్పొచ్చు. కానీ నేను వారితోపాటు కథ గురించి ఆలోచించి ఓకే చేశా. ‘అత్తారింటికి దారేది’లోని హీరోయిన్‌ ప్రణీత తరహా పాత్ర అయితే నేను చెయ్యనని ముందే చెప్పేశా. అలా ఉండదని త్రివిక్రమ్‌గారూ మాటిచ్చారు. ఆ సినిమా సరిగ్గా ఆడలేదేమో కానీ నాకు కీర్తీసురేశ్‌కూ మంచి పేరే వచ్చింది.
‘అజ్ఞాతవాసి’ మినహా అన్ని సినిమాల్లోనూ లిప్‌లాక్‌ చేసినట్టున్నారు?
అనూ : కమర్షియల్‌ సినిమాకు గ్లామర్‌ హంగు ఉండాలన్నది ఓ సూత్రం. కాబట్టి కథ డిమాండ్‌ మేరకు స్కిన్‌ షో, లిప్‌లాక్‌ తప్పనిసరి. మీరు బాగా గమనిస్తే కావాలని ఇరికించినట్టు ఎక్కడా అనిపించవు.
సినిమా ఇండస్ట్రీలోకి అడుగుపెట్టాక మీలో వచ్చిన మార్పు?
అనూ : పెద్ద మార్పేమీ లేదు. నేను నాలాగే ఉండటానికి ఇష్టపడతా. అలాగే ఉన్నా. పరిస్థితుల్ని బట్టి మారాలి, మార్పును స్వీకరించాలని ఇప్పుడిప్పుడే అర్థమవుతోంది. ఎక్కడి నుంచో వచ్చినవాళ్లు ఏ సపోర్టూ లేకుండా ఇక్కడ ఎదగడం అంత ఈజీ కాదు. చాలా కృషి చెయ్యాలి. ఏ ఇండస్ట్రీలోనైనా ఓ సాధారణ మనిషి ఎదగాలి అంటే చుట్టూ ఉన్న మనుషుల్ని హ్యాండిల్‌ చెయ్యడం నేర్చుకోవాలి. నేను భయపడేది ఫెయిల్యూర్‌కి మాత్రమే! ఈ ఫీల్డ్‌లో జయాపజయాలు సహజం. ఏదీ మన చేతిలో ఉండదు. సక్సెస్‌ వస్తే ‘గోల్డెన్‌ లెగ్‌,’ లేకపోతే ‘ఐరెన్‌లెగ్‌’ అంటారు. ఇలాంటి వాటిని జయించాలనే తపన బాగా పెరిగింది. కొన్ని సందర్భాల్లో వీటిని విని వదిలేయాలి తప్ప ఇంటి వరకూ తీసుకెళ్లకూడదనిపిస్తుంది. కంట్రోల్‌ చెయ్యడం కూడా ఎవరి వల్లా కాదని నా ఫీలింగ్‌. ఇలాంటి వాటిని మరచిపోవడానికి నేను చదివిన సైకాలజీ బాగా ఉపయోగపడుతుంది.
నటిగా ఎవరి ప్రభావమైనా మీపై ఉందా?
అనూ : అలాంటిదేమీ లేదు. నటి అయినా, వేరే రంగంవారైనా వాళ్లకంటూ ఓ స్టైల్‌ ఉండాలని నమ్ముతా. మరొకరిని చూసి ఇన్‌స్పైర్‌ కావచ్చు. కానీ అది అన్ని సందర్భాల్లోనూ కాకూడదు. నాకు శ్రీదేవి, మాధురీ దీక్షిత్‌, సమంత అంటే చాలా ఇష్టం. నటిగా ఉన్నతమైన స్థాయిలో ఉండాలన్నది నా ఆకాంక్ష.
డ్రీమ్‌ రోల్స్‌ ఏమన్నా ఉన్నాయా?
అనూ : డ్రీమ్‌ రోల్స్‌ ఏమీలేవు కానీ ‘మహానటి’లో కీర్తీ సురేశ్‌ చేసిన పాత్ర కోసం ఎదురుచూస్తున్నా. ఆ పాత్ర తనను ఎక్కడికో తీసుకెళ్లిపోయింది. ఆర్టిస్ట్‌ కెరీర్‌ టర్న్‌ అవ్వాలంటే అలాంటి ఓ క్యారెక్టర్‌ పడాల్సిందే. నాకు ప్రయోగాలు చెయ్యాలని లేదు. ఎవర్నీ పోటీగా భావించను. ఇంకా నేను నేర్చుకునే దశలోనే ఉన్నాను.
మీలో మీకు ప్లస్‌ అనిపించేది?
అనూ : ఇండిపెండెంట్‌గా ఉండటం, బోల్డ్‌నెస్‌ నాలో నాకు నచ్చిన గుణాలు. ఇక నాలో ప్లస్‌ పాయింట్‌ అంటే నా కళ్లే. అవి పెద్దగా, గుండ్రంగా ఉంటాయని చిన్నప్పటి నుంచీ అందరూ చెబుతుంటారు. సినిమా అభిమానుల నుంచి వచ్చిన కాంప్లిమెంట్‌ కూడా అదే. పైకే ఇగోయి్‌స్టలా కనిపిస్తాను కానీ లోపల జాలి గుణం కాస్త ఎక్కువే.
మీ హీరోల స్వభావాల్లో మీకు నచ్చింది?
అనూ : నేను పని చేసిన ప్రతి హీరోలోనూ డెడికేషన్‌ను బాగా ఇష్టపడతా. పవన్‌కల్యాణ్‌, బన్నీ, నాని, నాగచైతన్య, రాజ్‌తరుణ్‌ ఇలా ప్రతి ఒక్కరిదీ ఓ స్టైల్‌. ఒకర్ని మించినవారు ఒకరు.
 
మీకు నచ్చినవి.. నచ్చనివి?
అనూ : ఒత్తిడి ఫీల్‌కావడం నచ్చదు. సినిమా మేకింగ్‌లో ఉన్న కిటుకులు తెలుసుకోవడం అంటే చాలా ఇష్టం. నాన్నలా సక్సెస్‌ఫుల్‌ నిర్మాత కావాలని ఉంది. కానీ ఎప్పుడో తెలీదు.
సలహా తీసుకోవడం నచ్చదు..
అనూ : ‘మజ్ను’ తర్వాత నాకు బాగా నచ్చిన సినిమా ‘శైలజారెడ్డి అల్లుడు’. నటనకు స్కోపున్న పాత్ర అది. నిజజీవితంలో నాకు ఇగో ఎక్కువ. అలాంటి పాత్రే ‘శైలజారెడ్డి అల్లుడు’లో చేశా. కానీ సినిమాలో చూపించినంత ఇగోయి్‌స్టను కాదు. ఇప్పటి వరకూ చేసిన సినిమాల్లో నేను పెద్దగా మాట్లాడింది లేదు. ఇందులో కాస్త లౌడ్‌ క్యారెక్టర్‌ దక్కింది. మంచైనా, చెడు అయినా ఒకరి సలహా తీసుకోవడం నాకు నచ్చదు. నాకు నచ్చినట్లుగా ముందుకెళ్తా. ఇది చెయ్యొచ్చు అని నా మనసుకి అనిపిస్తే చేసేస్తా. కానీ రమ్యకృష్ణగారితో పనిచేశాక ఆ పద్ధతి తప్పని తెలుసుకున్నా. నాకు తెలియకుండానే ఆమె దగ్గరకు వెళ్లి అడిగి మరీ సలహాలు తీసుకున్నా. ఆమెలోని గ్రేస్‌ చూసి ఆశ్చర్యపోయేదాన్ని. ఆమె నటన, డెడికేషన్‌ చూశాక ఊరకే ఎవరూ స్టార్స్‌ కారు అనిపించింది.
మూడ్‌ను బట్టి..
అనూ : స్టైలింగ్‌ విషయంలో నా ఆలోచనలు ఎప్పటికప్పుడు మారిపోతుంటాయి. అప్పటి మూడ్‌ను బట్టి దుస్తులు ధరిస్తా. క్లాసిక్‌ స్టైల్‌ అంటే చాలా ఇష్టం. నా చర్మం త్వరగా డ్రై అయిపోతుంది. అందుకే ఎక్కువగా లోషన్స్‌ ఉపయోగిస్తా. నేనంత ఫిట్‌నెస్‌ ఫ్రీక్‌ని కాదు. కథానాయికకు కావలసిన ఫిట్‌నెస్‌ ఉండేలా చూసుకుంటా. అదే పనిగా వర్కవుట్స్‌ చెయ్యను. వారానికి రెండుసార్లు జిమ్‌ చేస్తా.
నా హీరోలు-నా మాట
పవన్‌ కల్యాణ్‌: మంచితనం
అల్లు అర్జున్‌: సిన్సియర్‌
నాని: రొమాంటిక్‌ పర్సన్‌
నాగ చైతన్య: కంఫర్టబుల్‌ కో-స్టార్‌
గోపీచంద్‌: కామ్‌ గోయింగ్‌
నా ఇష్టాలు
ఇష్టమైన ప్రదేశం: ఇల్లు
ఆహారం: ఫలానా అని చెప్పడం కష్టం. కానీ చైనీస్‌ ఫుడ్‌ అంటే చాలా ఇష్టం.
ఇష్టమైన సినిమా: నోట్‌బుక్‌ (ఇంగ్లిష్‌)
ఇష్టమైన పుస్తకం: ఓఫ్రా విన్‌ ఫ్రే రచన ‘వాట్‌ ఐ నో ఫర్‌ ష్యూర్‌’
ఆలపాటి మధు
ఫొటోలు: ఎం. గోపీకృష్ణ

Heroine Sumalatha

ఆ ఆలోచన ఆయనకు ఎప్పుడూ లేదు!
07-04-2019 00:25:57
సుమలతా అంబరీశ్‌… ఈ ఎన్నికల వేళ మారుమోగుతున్న పేరు. నిన్నటి వరకు బహుభాషా నటి, కన్నడ రెబల్‌ స్టార్‌ అంబరీశ్‌ సతీమణి మాత్రమే! నేడు… భర్తను ఆరాధించిన ప్రజల ఆకాంక్షలు నెరవేర్చేందుకు పిడికిలి బిగించిన ధీశాలి. కర్ణాటకలోని మండ్య లోక్‌సభ స్థానం నుంచి స్వతంత్ర అభ్యర్థిగా బరిలో నిలిచిన ఆమె… జనతాదళ్‌(ఎస్‌) ముఖ్యమంత్రి కుమారస్వామి తనయుడు, హీరో నిఖిల్‌తో ఢీకొంటున్నారు. బాల్యంలో ఒడుదొడుకులు… రాజకీయాల్లోకి రాగానే ఎదురుదెబ్బలు… అన్నింటికీ ఎదురొడ్డి గెలుపుపై ధీమాతో దూసుకుపోతున్న సుమలత అంతరంగం ఇది…
సినిమాల్లోకి ఎలా వచ్చారు?
నాకు ఏడేళ్ల వయస్సులోనే నాన్న మాకు దూరమయ్యారు. మేం ఐదుగురు పిల్లలం. అందరి బాధ్యతా అమ్మ భుజాలపై పడింది. అయితే నేను పదో తరగతి చదువుతుండగా అనుకోకుండా సినిమాల్లో నటించే అవకాశం వచ్చింది. ఒకటో రెండో అనుకున్నా… కానీ అవకాశాలు పెరిగి, ఏకంగా చదువు ఆపేయాల్సి వచ్చింది. చివరకు సినిమానే జీవితంగా మారిపోయేంతగా అనుబంధం ఏర్పడింది. తెలుగు, కన్నడ, తమిళ, మళయాళం, హిందీ భాషలన్నింటిలోను నటించాను. ఆ తర్వాత కన్నడంలో రెబల్‌స్టార్‌గా రాణిస్తున్న అంబరీశ్‌తో పెళ్లయింది.
సహ నటులలానే రాజకీయాలలోకి రావాలనుకున్నారా?
సినిమాల్లో బిజీగా గడిపే కాలమది. అప్పట్లో నేను నటిస్తున్న అన్ని భాషలలోనూ ప్రముఖ నటులు రాజకీయాల వైపు వచ్చి రాణించారు. ఎన్నో సినిమాల్లో రాజకీయ ఇతివృత్తం కలిగిన పాత్రలు పోషించాను. కానీ ఎప్పడూ అటువైపు వెళ్లాలని ఆలోచించలేదు. ఆంధ్రప్రదేశ్‌, తమిళనాడు, కర్ణాటకలోనూ ఎందరో నటులు రాజకీయ పార్టీలు స్థాపించినా… ఏ పార్టీలోకీ వెళ్లాలని కానీ, ప్రచారాలు చేయాలని కానీ అనుకోలేదు.
 
అంబరీశ్‌ రాజకీయాల్లోకి ఎలా వచ్చారు?
ఇరువురం సినిమా రంగంలో బిజీగా గడిపే రోజులలోనే పెళ్లి చేసుకున్నాం. అప్పట్లో అంబరీశ్‌ను ఒక నటుడుగానే కాకుండా… కర్ణాటక చిత్ర పరిశ్రమ పెద్ద దిక్కుగా భావించేవారు. అదే సమయంలో అంబరీశ్‌ రాజకీయాల వైపు దృష్టి సారించారు. ఆయనకు తన సొంత జిల్లా మండ్య అంటే ఎక్కడ లేని అభిమానం. పండుగలు, పెళ్లిళ్లు… మండ్యలో ఏ కార్యక్రమం జరిగినా వెళ్లేవారు. అక్కడి ప్రజలతో మమేకమైపోయేవారు. ఆయనది విభిన్న జీవనశైలి. కష్టమని ఎవరొచ్చినా సాయం చేసేవారు. అందుకే ఆయన్ను ‘అభినవ కర్ణుడ’ని ప్రజలు పిలుచుకునేవారు.
 
ఆయన కేంద్ర మంత్రిగా ఉన్నప్పుడు మీరు ఏవైనా సలహాలిచ్చేవారా?
అంబరీశ్‌ ఎప్పుడూ సామాన్యుల గురించి ఆలోచించేవారు. ఆయనకు సలహాలిచ్చేంతటి పరిస్థితి మాకుండేది కాదు. ఎక్కువమందితో మాట్లాడేవారు. వారిలో అధికారులు, రైతులు, సినిమా రంగానికి చెందినవారుండేవారు. అందరి అభిప్రాయాలూ విని ఒక కచ్చితమైన నిర్ణయం తీసుకునేవారు. కావేరీ నదీ జలాల విషయంలో వివాదం తలెత్తినప్పుడు, కర్ణాటక ప్రజల పక్షాన నిలబడి కేంద్ర మంత్రి పదవికి రాజీనామా చేశారు. రాష్ట్రంలో పేదలకు మంచి చేసే అవకాశం దక్కిందని సంతోషించేవారు. ప్రచారాలకు దూరంగా, రాష్ట్రమంతటా వేలాదిమంది నిరుపేదలకు సొంతింటి కల సాకారం చేశారు. తన కుటుంబం నుంచి మరెవరినీ రాజకీయాల్లోకి తేవాలన్న ఆలోచన ఆయనకు ఎప్పుడూ ఉండేది కాదు.
మరి మీరు రాజకీయాల వైపు ఎలా నడిచారు?
అంబరీశ్‌ ఉన్నంత కాలం… ‘రాజకీయాలలోకి రావాలి… పదవులు అనుభవించాల’ని నేనెప్పుడూ అనుకోలేదు. ఆయన మాకు దూరమయ్యాక మండ్య జిల్లాలో లెక్కలేనన్ని సంతాప సభలు జరిగాయి. అంతటి అభిమానం అక్కడి ప్రజలది! ఆ సభలకు మా అబ్బాయి అభిషేక్‌తో వెళ్లాను. ప్రతి చోటా ఒకటే డిమాండ్‌… ‘ అంబరీశ్‌ అంటే మాకు ప్రాణం. ఆయనను మా కుటుంబ సభ్యుడిగా భావించాం. ఆయన ఆకాంక్షలు నెరవేరాలంటే మీరు రాజకీయాల్లోకి రావాలి’ అని! కానీ నేను అవేమీ పట్టించుకోలేదు. దీంతో వారు ‘అంబి (అంబరీశ్‌ను ప్రజలు ముద్దుగా పిలిచే పేరు) ఆశయాలు సాధించే దిశగా రాజకీయాల్లోకి రండి. లేదంటే ఈ సభల తర్వాత మాకు కనిపించొద్దు’ అన్నారు. ఏ పల్లెకెళ్లినా ఇదే డిమాండ్‌. అంబరీశ్‌ తర్వాత నా కొడుకే జీవితం అనుకున్నా. కానీ ఇంతమంది నన్ను అంబి రూపంలో ప్రాణం కంటే గొప్పగా అభిమానిస్తున్నారని తెలిసి భావోద్వేగానికి లోనయ్యాను. ఆ క్షణమే మండ్య నుంచి పోటీ చేయాలని నిర్ణయించుకున్నా.
 
కానీ, అంబరీశ్‌ పనిచేసిన కాంగ్రెస్‌ను ఎందుకు కాదనుకున్నారు?
కాంగ్రె్‌సలో ఉన్నప్పుడు అంబరీశ్‌ ఎన్నో పదవులు అనుభవించారు. అందుకే నేను సైతం అదే పార్టీ ద్వారా వెళ్లాలని అనుకున్నా. కానీ కాంగ్రెస్‌ పార్టీతో పొత్తు ఉన్నందున ఈ సీటు జేడీఎ్‌సకు వెళ్లింది. రాజకీయాలు చేయాలనీ, పదవులు పొందాలనీ, ఇంకేదో చేయాలనీ, మా అబ్బాయి భవిష్యత్తుకు బాటలు వేయాలనీ నాకెప్పుడూ లేదు. మండ్య ప్రజలతో కలిసి ఉండటమే నా భవిష్యత్తు అనుకున్నా. అయితే మండ్యలో కాకుండా బెంగళూరు దక్షిణ లేదా ఉత్తర నుంచి పోటీ చేయాలనీ, లేదంటే రాజ్యసభ సీటిస్తామని కాంగ్రెస్‌ చెప్పింది. జేడీఎస్‌ కూడా నన్ను ఎమ్మెల్సీని చేసి, మంత్రి పదవి ఇస్తామంది. సరే అంటే పదవి వచ్చేస్తుంది. కానీ నాకు ఆ పదవి కంటే మండ్య ప్రజలతో అనుబంధమే ముఖ్యమనుకున్నా.
కన్నడనాట ఎన్నికల్లో ఇప్పుడు మండ్యనే ప్రముఖంగా మారింది కదా!
మండ్యలో ఎన్నికలంటే ఆత్మాభిమానానికీ… అధికార పాలనకూ మధ్య జరుగుతున్న పోరాటం. నేను నామినేషన్‌ వేసినప్పటి నుంచి అధికార పార్టీ అడ్డంకులు సృష్టిస్తూనే ఉంది. నామినేషన్‌కు జనమొస్తే జీర్ణించుకోలేకపోయారు. నా సొంత పిల్లల్లాంటి సినీ హీరోలు దర్శన్‌, యశ్‌లు ప్రచారానికొస్తే బెదిరిస్తున్నారు. దీనికంతటికీ కారణం సీఎం కుమారస్వామి తనయుడు నిఖిల్‌ జేడీఎ్‌స-కాంగ్రె్‌సల ఉమ్మడి అభ్యర్థిగా ఇక్కడ పోటీ చేయడమే. ముఖ్యమంత్రి, ముగ్గురు మంత్రులు, ఐదుగురు శాసనసభ్యులు… ఇంతమంది కలిసి నిఖిల్‌ తరపున ప్రచారం చేస్తున్నారు. నిఖిల్‌ నామినేషన్‌లో తప్పులపై కేంద్ర ఎన్నికల సంఘానికి ఫిర్యాదు చేశా. నాపై కసితో సుమలత పేరున్న మరో ముగ్గురి చేత నామినేషన్లు వేయించారు. నా వ్యక్తిగత జీవితం గురించి, నా కులం గురించీ ఇష్టమొచ్చినట్లు మాట్లాడుతున్నారు. నా ఫోన్‌ ట్యాప్‌ చేశారు. ఇవేవీ పట్టించుకోని నేను ప్రశాంతంగానే ఉన్నా. కానీ ఉత్కంఠ అంతా ప్రత్యర్థుల్లోనే కనిపిస్తోంది.
ప్రచారంలో సుమలత ప్రత్యేకతలేంటి?
ప్రచారంలోనే కాదు… సుమలత అంటే ఎప్పుడూ సౌమ్యంగా ఉండాలనుకుంటా. కానీ అంబరీశ్‌ను సోదరుడనీ, తమ కుటుంబం సభ్యుడనీ చెప్పుకున్నవారు, ఆయనకు పాదాభివందనాలు చేసినవారే ఇప్పుడు నాపై వ్యక్తిగత ఆరోపణలు చేస్తున్నారు. ఎవరెన్ని విమర్శలు చేసినా పట్టించుకోను. పాజిటివ్‌ దృక్పథంతో ముందుకు వెళుతున్నా.
మీ అబ్బాయి అభిషేక్‌ను రాజకీయాలలోకి తీసుకొస్తారా?
అభిషేక్‌ ఇప్పుడే తొలి సినిమాలో నటిస్తున్నాడు. ఆ రంగంలో రాణించి, జీవితమంటే ఏంతో తెలుసుకోవాలి. ఎటువైపు నడవాలనేది వాడి నిర్ణయానికే వదిలేశాను. రాజకీయాలలోకి వస్తానంటే వద్దనేది లేదు.
 
గెలిస్తే ఏం చేయాలనుకుంటున్నారు?
గెలిచిన వెంటనే మండ్యను సింగపూర్‌ చేస్తానని చెప్పడం లేదు. అలాంటి వాగ్దానాలు చేయను. మండ్య ప్రజలు ఎదుర్కొనే సమస్యలు తెలుసుకున్నా. వాటికి కేంద్రం ద్వారా వచ్చే నిధులతో అభివృద్ధి చేసి చూపిస్తాను. ఇక ఓడిపోతే… ప్రజల తీర్పును గౌరవిస్తా. కానీ మండ్య ప్రజల అభిమానానికి మాత్రం దూరమవ్వను. జీవితకాలం వారితోనే కలిసివుంటా.
 
 
చిరంజీవి, రజనీకాంత్‌లను ఆహ్వానించలేదు…
చిరంజీవి, రజనీకాంత్‌లతో కలసి చాలా చిత్రాలు చేశాను. సహనటులుగానే కాదు… వారిద్దరూ నాకు సన్నిహితులు. అంబరీశ్‌కు వారంటే ఎంతో ఇష్టం. ఇరువురూ అపార అనుభవం కలిగినవారు. నా రాజకీయరంగ ప్రవేశాన్ని అభినందించారు. కానీ ప్రచారాలకు నేను ఆహ్వానించలేదు. అయితే మీడియాలో ప్రచారం జరుగుతోంది. అటువంటి ఆలోచన ఏదీ ప్రస్తుతానికి లేదు.
 
అమ్మ, ఆయనే నాకు స్ఫూర్తి…
నా చిన్నప్పుడే నాన్న చనిపోతే… ఐదుగురు పిల్లలను మా అమ్మ పెంచి పెద్ద చేసింది. ఇందుకు ఆమె పడిన కష్టాలు చూశాను. అందుకే నాకు అమ్మకు మించిన స్ఫూర్తి ఎవరూ లేరు. ఆ తర్వాత అంబరీశ్‌తో గడిపిన 27 ఏళ్లలో ఎన్నో నేర్చుకున్నా. కష్టంలో ఉండేవారి పట్ల దయ, ఎలాంటి పరిస్థితుల్లోనైనా ప్రేమాభిమానాలు చూపడం ఆయనలోని ప్రత్యేకత. సమాజంలో నేటికీ మహిళలంటే తక్కువనే అభిప్రాయాలు పూర్తిగా పోలేదు. ఎన్నికలలో పోటీ చేస్తే ఆప్తులు, బంధువులు కూడా గేలి చేస్తున్నారు. వీటన్నింటికీ ఎదురు నిలిచి ముందుకెళ్లాలనేది… మా అమ్మ, ఆయన నుంచే నేర్చుకున్నా.
 
సేకరణ: హిందూపురం రవి
ఫొటోలు: కె.ఎన్‌.శివణ్ణ

director Gowtam Tinnanuri

నానీకి కథ నచ్చలేదు అనుకున్నా!

జెర్సీ… టాలీవుడ్‌ని మరో మెట్టెక్కించిన సినిమాగా ప్రేక్షకులతోపాటు సినీ వర్గాలూ ప్రశంసిస్తున్నాయి. ఆంధ్రా, నైజాం, సీడెడ్‌ ప్రాంతాలూ… ఏ, బీ, సీ సెంటర్లూ అన్న తేడా లేకుండా అంతటా కలెక్షన్లు కురిపిస్తున్న ‘జెర్సీ’ వెనక కీలకవ్యక్తి దర్శకుడు గౌతమ్‌ తిన్ననూరి. సుఖంగా ఉన్న సాఫ్ట్‌వేర్‌ ఉద్యోగం వదిలి సినిమాల కోసం వచ్చి ఎదుర్కొన్న కష్టాల్నీ,  జెర్సీ కోసంపడ్డ శ్రమనీ, తన విజయం వెనకున్న వ్యక్తుల్నీ గుర్తుచేసుకుంటున్నాడిలా…

మా సొంతూరు రాజమండ్రి. అక్కడే ఇంటర్మీడియెట్‌ వరకూ చదువుకున్నా. 2004లో గుడ్లవల్లేరులో ఇంజినీరింగ్‌ పూర్తిచేశాక దిల్లీ వెళ్లి ఎంబీఏ చేశా. తర్వాత బెంగళూరు యాక్సెంచర్‌లో ఐటీ కన్సల్టెంట్‌గా చేరా. చదువుకునే రోజుల్లో ‘మంచి ఉద్యోగం సంపాదిస్తే జీవితంలో అంతకంటే ఏం కావాలి’ అనుకునేవాణ్ని. కానీ ఉద్యోగంలో చేరిన కొన్నేళ్లకే ఇంకేదో కావాలీ, చెయ్యాలీ అనిపించింది. అప్పటికే బెంగళూరులో స్టార్టప్‌ల సందడి బాగా ఉండేది. కొద్దిమంది ఫ్రెండ్స్‌తో కలిసి ఆ ప్రయత్నమూ చేశాను. కానీ అవేవీ కార్యరూపం దాల్చలేదు. అప్పుడే హైదరాబాద్‌లో ఉంటున్న స్కూల్‌ ఫ్రెండ్‌ ఫోన్‌ చేసి సినీ హీరో అయ్యే ప్రయత్నాల్లో ఉన్నట్టు చెప్పాడు. అప్పుడు నాకో ఆలోచన వచ్చింది. ‘ఒక వెబ్‌సైట్‌ పెట్టి అందులో సినిమాల్లోకి రావాలనుకునేవాళ్లు ప్రొఫైల్స్‌ పెడితే, వాటిని దర్శకనిర్మాతలు చూసి ఆఫర్లు ఇచ్చేలా చేస్తే…’ అన్నాను. వాడూ సరే అన్నాడు. హైదరాబాద్‌లో ఉంటేనే ఇది సాధ్యమని, ఇక్కడకు వచ్చి డెలాయిట్‌లో చేరాను.

అనుకోకుండా సినిమాల్లోకి…
మా వెబ్‌సైట్‌కి అనుకున్న స్పందన రాలేదు. ఆ తర్వాత కూడా మా ఫ్రెండూ నేనూ సినిమాల గురించే మాట్లాడుకునేవాళ్లం. వాడికి కొన్ని కథల ఆలోచనలు ఉండేవి. స్కూల్‌ రోజుల నుంచీ చిన్న చిన్న కథలూ, కాన్సెప్ట్‌లు రాయడం నాకు అలవాటు. మావాడి ఆలోచనలకి నా అనుభవాన్ని జోడించి కథలు రాసేవాణ్ని. అలా రాసే క్రమంలో ఒక కథ పూర్తిస్థాయి సినిమా స్క్రిప్టుగా తయారైంది. దాన్ని నిర్మాణ సంస్థలకు అమ్మే ప్రయత్నం చేశాం. అప్పుడు ఒకాయనకి మా కథ నచ్చి ‘డబ్బు పెడతా, మీరే డైరెక్షన్‌ చెయ్యండి’ అన్నాడు. నా ఫ్రెండ్‌ దర్శకుడిగా, నేను అసిస్టెంట్‌ డైరెక్టర్‌గా సినిమా మొదలుపెట్టాం. ఫుల్‌టైమ్‌ పనిచేయాలని ఉద్యోగానికి రాజీనామా చేశాను. ఓ ఆరు నెలలు పూర్తిగా సినిమాకి కేటాయించాలనుకున్నాను. ఎప్పుడైనా షూటింగ్‌ చూడ్డం తప్పించి సినిమా తీసిన అనుభవం మాకు లేదు. అయినా కష్టపడి నెలరోజుల్లో షూటింగ్‌ పూర్తిచేశాం. మా ఫ్రెండ్‌ హైదరాబాద్‌లో సినిమా పనులు చూసుకుంటే, పోస్ట్‌ ప్రొడక్షన్‌ పనుల కోసం నేను చెన్నై వెళ్లాను. ఆ పనులు జరుగుతుండగానే నిర్మాత చేతులు ఎత్తేశాడు. ఆలోపు చెన్నైలో మా సినిమాకి పనిచేసిన టెక్నీషియన్స్‌ అందరూ నాకు ఫ్రెండ్స్‌ అయిపోయారు. వాళ్లతో పనిచేస్తున్నపుడే సినిమా తీయడం గురించి అవగాహన వచ్చింది. ఇష్టమూ పెరిగింది. అక్కడే వాళ్లకి అసిస్టెంట్‌గా ఉంటూ ఎడిటింగ్‌, సౌండ్‌ మిక్సింగ్‌… లాంటివి తెలుసుకున్నాను. 2011-12 మధ్య దాదాపు ఏడాదిన్నరపాటు అక్కడ పనిచేశా. 2012 చివర్లో మళ్లీ
హైదరాబాద్‌ వచ్చి సొంతంగా కథలు రాసేవాణ్ని. వాటిని ఎవరికైనా ఇద్దాం అని నిర్మాతల్ని సంప్రదించేవాణ్ని. కానీ సరైన స్పందన వచ్చేది కాదు. అప్పుడే డైరెక్షన్‌ వైపు వెళ్లాలనుకున్నాను.

హిట్‌ అంటే నమ్మలేదు!
కొంతమంది నిర్మాతల్ని కలిసి ‘మళ్లీరావా’ స్క్రిప్టుని వినిపించినా ఎవరూ ముందుకు రాలేదు. అప్పుడే రాహుల్‌ యాదవ్‌ సినీ నిర్మాణంలోకి అడుగుపెట్టే ప్రయత్నాలు చేస్తున్నాడు. ఎవరో స్టోరీ చెబుతామంటే, విని సరిగ్గా జడ్జ్‌ చేయడానికి ఒకరు తోడుంటే బావుణ్నని చూస్తున్నాడు. ఆ సమయంలో ఒక ఫ్రెండ్‌ నన్ను రాహుల్‌కి పరిచయం చేశాడు. ఇద్దరమూ వెళ్లి కథ విన్నాం. బయటకు వచ్చాక ‘కథ ఎలా ఉంది’ అని అడిగాడు. ‘నేను చెప్పలేను’ అన్నాను. ‘లేదు చెప్పాలి’ అని గుచ్చి గుచ్చి అడిగితే నచ్చలేదని చెప్పాను. దాంతో రాహుల్‌ అతడికి ‘నో’ చెప్పేశాడు. అది జరిగిన వారం తర్వాత ఫోన్‌చేసి ‘నీ దగ్గర కథ ఉందన్నావు అది నాకు చెబుతావా’ అన్నాడు. తనకు ‘మళ్లీరావా’ స్క్రిప్టు ఇస్తే, చదివి నచ్చిందన్నాడు. ‘నాకూ పరిశ్రమ కొత్త… నేను 30 శాతం బడ్జెట్‌ పెడతాను. మిగిలిన 70 శాతం పెట్టేవాళ్లు ఎవరైనా ఉంటారేమో చూద్దాం’ అన్నాడు. నేను ఒక్క షార్ట్‌ఫిల్మ్‌ కూడా తీయలేదు… అయినా నా మీద నమ్మకంతో కొంతైనా డబ్బు పెడుతున్నాడంటే ఎలా కాదనగలను… అందుకే ఆ ప్రతిపాదనకు ఓకే చెప్పాను. ఇద్దరం కలిసి పార్ట్నర్‌ కోసం ఎంత వెతికినా దొరకలేదు. రోజులు గడిచిపోతున్నాయి. రాహుల్‌ ఓరోజు వచ్చి ‘నేనే పూర్తి బడ్జెట్‌ పెడతాను’ అన్నాడు. నామీద సానుభూతితో అలా అంటున్నాడేమోనని ‘వద్దు ఇంకొన్నాళ్లు వేచి చూద్దాం’ అన్నాను. తను మాత్రం చేద్దాం అన్నాడు. అప్పుడు నాకో ఐడియా వచ్చింది. ‘ఒక అయిదు నిమిషాల డెమో వీడియో తీద్దాం. అది బాగా వస్తే ముందుకు వెళ్దాం. లేకపోతే వద్దు’ అని రాహుల్‌కి చెప్పాను. అతను ఓకే అన్నాడు. నా కథలో భాగమైన ఒక పాటని తీశాను. అది అందరికీ నచ్చింది.  దాంతో మా ప్రాజెక్టు పట్టాలెక్కింది. ఇద్దరు వ్యక్తుల మధ్య ప్రేమ టీనేజ్‌లో, ఇరవైల్లో, ఇంకాస్త పెద్దయ్యాకా ఎలా ఉంటుందనేది కథ. సుమంత్‌కి కథ చెబితే నచ్చిందన్నారు. డెమో వీడియోకి పాట రాసిన కేకే, సంగీతం అందించిన శ్రావణ్‌ భరద్వాజ్‌, కెమెరామేన్‌గా పనిచేసిన సతీష్‌ ముత్యాల వీళ్లనే సినిమాకీ తీసుకున్నాను. సినిమా పూర్తిచేసి బయ్యర్లకి చూపిస్తే బాగుందన్నారు కానీ కొనడానికి వెనకాడారు. రాహుల్‌ మరో సాహసం చేసి సొంతంగా రిలీజ్‌ చేశాడు. 2017 డిసెంబరు ఎనిమిదిన రిలీజ్‌ అయింది. ఆరోజు ఉదయం ప్రసాద్స్‌ ఐమ్యాక్స్‌లో సినిమా చూస్తున్నాను. ప్రేక్షకుల నుంచి స్పందన బాగుంది. కానీ అక్కడ ఉన్నవారిలో చాలామంది మా టీమ్‌లోవాళ్లూ, బంధువులూనూ. అందుకని ఇంటర్వెల్‌ తర్వాత ఆర్టీసీ క్రాస్‌రోడ్స్‌లోని దేవి థియేటర్‌కి వెళ్లాను. మార్నింగ్‌ షో స్టార్ట్‌ అయింది. లోపల చూస్తే 30-40 మంది కనిపిస్తున్నారు. ‘చచ్చింది గొర్రె’ అనుకున్నాను. బయటకు వచ్చాక ప్రసాద్స్‌లో షో చూసిన మావాళ్లంతా ఫోన్‌చేసి సినిమా బాగుందని చెబుతున్నారు. నాకు నమ్మబుద్ది కాలేదు. మొదటి సినిమా కదా, సరిగ్గా తీశానా లేదా అన్నది నా సందేహం. వెబ్‌సైట్లలో రివ్యూలు బాగా వచ్చాయి. మార్నింగ్‌ షోకి 10 శాతం సీట్లు నిండితే మేట్నీకి 50 శాతం, ఫస్ట్‌షోకి 80 శాతం నిండాయని రిపోర్ట్‌ వచ్చింది. అప్పుడు ఊపిరి పీల్చుకున్నాను. తక్కువ బడ్జెట్‌లో తీయడంవల్ల మా పెట్టుబడికి మంచి లాభాలే వచ్చాయి.

హిట్‌ తర్వాత పాఠాలు
‘మళ్లీరావా’ తర్వాత చాలామంది నిర్మాతలు ఫోన్లు చేసి కథ ఉంటే చెప్పమన్నారు. కానీ బ్రేక్‌ తీసుకుంటానని చెప్పి ఊరుకున్నాను. ‘మళ్లీరావా’ తీస్తున్నపుడు కొన్ని ఇబ్బందుల్ని ఎదుర్కొన్నాను. నేను ఎవరి దగ్గరా అసిస్టెంట్‌గా పనిచేయలేదు. మెరుగవ్వాలంటే శిక్షణ అవసరమనిపించింది. అప్పుడు ముంబయిలోని ‘న్యూయార్క్‌ ఫిల్మ్‌ అకాడమీ’లో నిర్వహించే మూడు నెలల స్క్రీన్‌ప్లే కోర్సులో శిక్షణ తీసుకున్నాను. సినిమా అనుభవానికి అది తోడయ్యేసరికి నా రాతలో చాలా మార్పు వచ్చింది. ఉదయం పూట క్లాసుకి వెళ్తూనే, సాయంత్రం కథలు రాసుకునేవాణ్ని. శిక్షణ పూర్తిచేసి హైదరాబాద్‌ తిరిగి వచ్చేసరికి చేతిలో రెండు కథలు ఉన్నాయి.

‘మళ్లీరావా’ని ఓ ఆప్‌లో చూశారట నిర్మాత నాగ వంశీ. ‘నాకు బాగా నచ్చింది, ఏదైనా కథ ఉంటే చెప్పు’ అని ఫోన్‌చేసి చెప్పారు. అప్పుడే ‘జెర్సీ’ కథని చెప్పాను. ఆయనకి బాగా నచ్చింది. ‘హీరోగా ఎవరిని అనుకుంటున్నావు’ అన్నారు. నానీ పేరు చెప్పాను. ఆయన అపాయింట్‌మెంట్‌ తీసుకున్నారు. నానీ కథ విన్నంతసేపు ఎలాంటి ఎక్స్‌ప్రెషనూ ఇవ్వలేదు. ‘ఏంటీ ఈయనకి నచ్చడంలేదా’ అనుకున్నాను మనసులో. ఫస్ట్‌ హాఫ్‌ విన్నాక… ‘సెకండ్‌ హాఫ్‌ కూడా ఇంతే బావుంటుందా’ అన్నారు. అప్పుడు ధైర్యం వచ్చింది. సెకండ్‌ హాఫ్‌ కూడా విన్నాక… ‘బాగుంది, చేద్దాం’ అన్నారు. సచిన్‌ గొప్ప క్రికెటర్‌ ఎలా అయ్యాడన్న విషయం మీద హర్షభోగ్లే స్పీచ్‌ ఇస్తూ, టాప్‌-10లో అందరూ సచిన్‌ అంత టాలెంట్‌ ఉన్నవాళ్లే ఉంటారు. కానీ యాటిట్యూడ్‌ కారణంగా సచిన్‌ నంబర్‌వన్‌ అయ్యాడని చెప్పారు. మరి మిగిలిన తొమ్మిది మంది పరిస్థితి ఏంటన్న ఆలోచన నుంచి పుట్టిందే జెర్సీ కథ. ఈ కథకి ఆత్మ మానవ సంబంధాలూ, భావోద్వేగాలు. క్రికెట్‌ అనే కాకుండా ఫుట్‌బాల్‌, బిజినెస్‌, సినిమా… వీటిలో దేన్నైనా నేపథ్యంగా ఎంచుకోవచ్చు. కానీ నాకు క్రికెట్‌ గురించి తెలుసు కాబట్టి ఆ నేపథ్యమైతే చెప్పడానికి సులభంగా ఉంటుందని కథ అలా రాసుకున్నాను. అదే సమయంలో ఆటలో సహజత్వం లేకపోతే ప్రేక్షకుల్ని మెప్పించలేం. అందుకే ప్రొఫెషనల్‌గా కనిపించడానికి ప్రత్యేకంగా నానీ క్రికెట్‌లో శిక్షణ తీసుకున్నారు. షూటింగ్‌ సమయంలో మాతోపాటు కోచ్‌ డానియల్‌ కూడా ఉండి షాట్స్‌ ఓకే చెప్పాకే వాటిని ఫైనల్‌ చేసేవాళ్లం. హైదరాబాద్‌లోని వివిధ అకాడమీల్లోని 250 మంది క్రికెటర్లని ఎంపికచేసి వాళ్లతో షూటింగ్‌ చేశాం. ఒక ఫిజియో, డాక్టర్‌ కూడా మాతో ఉండేవారు.

చాలావరకూ సహజంగా ఆడిస్తూ వాటినుంచి చాలా క్లిప్‌లు తీసుకున్నాం. స్లిప్‌లో ఒక క్యాచ్‌ కోసం రెండున్నర గంటలపాటు ప్రయత్నించామంటే అర్థం చేసుకోండి. సినిమాలో న్యూజిలాండ్‌ జట్టుగా కనిపించింది ఇంగ్లాండ్‌కి చెందిన లివర్‌పూల్‌ కౌంటీ టీమ్‌. ఆటగాళ్లతోపాటు వాళ్ల కోచ్‌, ఫిజియో కూడా వచ్చారు. దాంతో సినిమాలో సహజత్వం వచ్చింది. సినిమా బాగా తీశానంటే ఆ క్రెడిట్‌ నా ఒక్కడిదే కాదు, మా టీమ్‌ అందరిదీ. ‘మళ్లీ రావా’కి పనిచేసిన నా డైరెక్షన్‌ డిపార్ట్‌మెంట్‌ అంతా ఈ సినిమాకీ పనిచేసింది. వివేక్‌ సాగర్‌, వీరూ… నాకంటే అనుభవజ్ఞులు. మధ్యలో ఏ ప్రాజెక్టూ చేయకుండా నా రెండో సినిమా కోసం వేచి చూశారు. మిగతా విభాగాలకీ మంచి సాంకేతిక నిపుణుల్ని ఎంపికచేశాం. జెర్సీలాంటి హిట్‌ కెరీర్‌లో రెండో సినిమాగా రావడం నిజంగా నా అదృష్టం. కొద్దిరోజులు సినిమా ప్రపంచానికి దూరంగా స్నేహితులూ, కుటుంబ సభ్యులతో గడుపుతాను. ఆ దశలోనే మళ్లీ ఏదో ఒక అనుభవం కథ రాసేందుకు స్ఫూర్తినిస్తుంది.


ఆమె సహకారం…

నా శ్రీమతి సుధ. మాది ప్రేమ వివాహం. ఇంజినీరింగ్‌లో నా క్లాస్‌మేట్‌. పెళ్లయిన రెండేళ్లకే ఉద్యోగం మానేశాను. సినిమా ప్రయత్నంలో అయిదేళ్లపాటు ఉద్యోగానికి దూరంగా ఉన్నాను. ఆ సమయంలో తన జీతంతో ఇంటిని నడిపించేది.
* మాకో అబ్బాయి. పేరు… కార్తీక్‌.
* నాన్న గణేష్‌బాబా రిటైర్డ్‌ ప్రభుత్వ ఉద్యోగి. అమ్మ నాగమణి గృహిణి. రాజమండ్రిలోనే ఉంటారు. నా సినిమా రిలీజ్‌ ఉందంటే కచ్చితంగా హైదరాబాద్‌ వస్తారు. అమెరికాలో ఉండే మా చెల్లి కూడా వచ్చేస్తుంది.
* సినిమా తీస్తున్నన్నిరోజులూ అదే ప్రపంచం. ఖాళీ దొరికితే పుస్తకాలూ, జర్నల్స్‌ చదువుతాను. చరిత్ర పుస్తకాలంటే బాగా ఇష్టం. స్ఫూర్తినిచ్చే ప్రసంగాలు వింటాను.